اسلام آباد: حڪومت چونڊ سڌارن بابت بل جو مسودو تيار ڪري ورتو جنهن جي تحت سمنڊ پار پاڪستانين کي ووٽ جو حق ڏيڻ ۽ 2023 جي چونڊن ۾ مڪمل طور تي بائيو ميٽرڪ سسٽم آڻڻ جو فيصلو ڪيو ويو آهي. چونڊ سڌارا بل جي مسودي ۾ 35 کان وڌيڪ نقطا شامل آهن، تجويز ڪيل بل ۾ سمنڊ پار پاڪستانين کي ووٽ جو حق ڏيڻ جو اصولي فيصلو ڪيو آهي، سمورا سمنڊ پار پاڪستاني اليڪٽرانڪ سسٽم جي تحت ووٽ وجهي سگهندا. تجويز ڪيل بل موجب اڳتي لاءِ گلگت بلتستان جي اليڪشن ۾ سمنڊ پار پاڪستاني پنهنجو حق استعمال ڪري سگهندا جڏهن ته 2023 جي چونڊن ۾ مڪمل طور تي بائيو ميٽرڪ سسٽم آڻڻ جو فيصلو ڪيو ويو آهي، بائيو ميٽرڪ جو پهريون تجربو 3 مهينن کان پوءِ گلگت بلتستان ۾ ڪيو ويندو.
تجويز ڪيل بل ۾ سينيٽ اليڪشن ۾ هارس ٽريڊنگ روڪڻ جي لاءِ به قدمن جي نشاندهي ڪئي وئي آهي، بل ۾ سينيٽ اليڪشن وزير اعظم جي چونڊن جيان ڪرائڻ جي تجويز ڏني آهي. تجويز ڪيل بل موجب پولنگ اسٽيشن جي چونڊ جو نتيجو 24 يا 48 ڪلاڪن بدران فوري موڪلڻو پوندو، پولنگ ايجنٽ ڳڻپ مڪمل ٿيڻ جي فوري بعد رزلٽ موڪلڻ جو پابند هوندو، ڀڃڪڙي ڪرڻ تي پريذائڊنگ آفيسر کي 3 سالن قيد جي سزا ملندي. ان حوالي سان پريس ڪانفرنس ڪندي منشيات جي تدارڪ بابت وفاقي وزير اعظم سواتي چيو ته چونڊ سڌارن جو ڊرافٽ وزير اعظم کي پيش ڪيو جنهن کي تقويت ملي، جيستائين ٻنهي ايوانن ۾ اڪثريت نه هوندي قانون سازي ۾ رنڊڪ آهي، عمران خان سينيٽ ۾ شفاف چونڊون چاهي ٿو. اعظم سواتي چيو ته سينيٽ چونڊن ۾ شو آف هينڊ هوندو، گذريل سينيٽ چونڊن ۾ 3 سيٽون رکڻ واري پارٽي 22 سينيٽر چونڊرايا، آئين ۾ ترميم تجويز ڪري رهيا آهيون جيئن هارس ٽريڊنگ هميشه جي لاءِ دفن ٿي وڃي. هن چيو ته عام چونڊون بائيو ميٽرڪ جي ذريعي ڪرائينداسين جيئن شفافيت تي ڪو به شڪ نه رهي، گلگت بلتستان ۾ چونڊون بائيو ميٽرڪ طريقي سان ٿينديون، گلگت بلتستان چونڊن ۾ سمنڊ پار ماڻهن جي ووٽ به هوندي. هن چيو ته اليڪشن ايڪٽ 2017 وڏو زبردست قانون آهي، جيڪا گهٽتائي رهجي وئي هئي اُها ختم ڪئي وئي، هاڻ پولنگ عملو لاڳاپيل تحصيل ۽ يونين ڪونسل جو نه هوندو، پريذائيڊنگ آفيسر ڪوڊ آف ڪنڊڪٽ جي ڀڃڪڙي ڪندو ته 3 سال قيد ملندي. اعظم سواتي وڌيڪ چيو ته اسان جي حڪومت وٽ اڪثريت ناهي.
