ڪراچي ( اسٽاف رپورٽر) ڪراچي ۾ پاڪستان اسٽاڪ ايڪسچينج تي حملي جي نتيجي ۾ هڪ پوليس اهلڪار سميت 4 ڄڻا شهيد ۽ 4 دهشتگرد مارجي ويا، ٽن پوليس اهلڪارن سوڌو 6 ڄڻا زخمي ٿي پيا، وڏي وزير سيد مراد علي شاهه واقعي بابت رپورٽ طلب ڪري ورتي آهي. پوليس موجب صبح جو تقريبن 10 وڳي 4 هٿيار بند پهريان اسٽاڪ ايڪسچينج جي گيٽ تي دستي بمن سان حملو ڪيو ۽ بعد ۾ انڌا ڌنڌ فائرنگ ڪئي. واقعي جو اطلاع ملندي ئي پوليس ۽ رينجرز جي وڏي نفري موقعي تي پهچي علائقي کي ڪڙو چاڙهي آپريشن ڪيو. پوليس موجب دهشتگردن وٽ جديد هٿيار هئا ۽ وٽن بارودي مواد سان ڀريل جيڪيٽس به موجود هيون. پوليس موجب رينجرز ۽ پوليس جي جوابي ڪارروائي ۾ ٽن دهشتگردن کي اسٽاڪ ايڪسچينج ۾ داخل ٿيڻ وقت ۽ هڪ دهشتگرد کي اسٽاڪ ايڪسچينج جي حال ۾ ماريو ويو. حملي جي ڪوشش دوران مارجي ويل چئني دهشتگردن جِي سليمان اَمل، شهزاد بلوچ، تسليم بلوچ ۽ سراج طور سڃاڻپ ٿي وئي آهي، جن جون عمريون 25 کان 30 سال جَي وچ ۾ ٻڌايون وڃن پيون. پوليس موجب، شهيدن جي سڃاڻپ سب انسپيڪٽر شاهد، ٽي سڪيورٽي گارڊ افتخار، خدا يار ۽ حسن علي طور ڪئي وئي، جڏهن ته زخمين ۾ ٽي اهلڪار سعيد اڪرام، شهزاد احمد، اهلڪار امتياز علي، گارڊ محمد وقاص، ٻه شهري عاشق ۽ عامر شامل آهن. اسٽاڪ ايڪسچينج تي حملي جا سي سي ٽي وي فٽيجز به سامهون اچي ويا. ڪراچي پوليس چيف ايڊيشنل آءِ جي غلام نبي ميمڻ حملي کي ناڪام قرار ڏيندي چيو ته دهشتگردن اسٽاڪ ايڪسچينج تي حملي جي ڪوشش ڪئي پر فورسز فوري طور تي ڪارروائي ڪندي کين ماريو ويو. ايڊيشنل آءِ جي چيو ته دهشتگرد پارڪنگ ايريا کان سلور رنگ جي ڪار ۾ آيا، جن وٽ هٿيار ۽ بارودي مواد به هو جيڪو سيڪيورٽي فورسز پنهنجي قبضي ۾ وٺي ڇڏيو. آءِ جي سنڌ طرفان آپريشن ۾ حصو وٺندڙ پوليس پارٽي لاءِ 20 لک رپين جو اعلان پڻ ڪيو ويو آهي. پوليس موجب، دهشتگردن جي استعمال هيٺ گاڏي جي رجسٽريشن بابت ڃاڻ ورتي پئي وڃي، گاڏي جي مالڪ جو پتو پوڻ کانپوءِ وڌيڪ جاچ اڳتي وڌائي ويندي. پوليس ۽ رينجرز ريسڪيو آپريشن بعد عمارت کي ڪليئر قرار ڏئي ڪي ايس اي جي چوڌاري پوليس ۽ رينجرز جا جوان مقرر ڪري ڇڏيا.
آرمي چيف جنرل قمر جاويد باجوا پاران پاڪستان اسٽاڪ ايڪسچينج تي حملي جي مذمت
آءِ ايس پي آر طرفان جاري ڪيل پڌرائي موجب، آرمي چيف جنرل قمر جاويد باجوا پاڪستان اسٽاڪ ايڪسچينج تي حملي ۾ شهيد ٿي ويل پوليس اهلڪار، سڪيورٽي گارڊز ۽ عام شهرين کي سلام پيش ڪيو. آرمي چيف چيو ته سڪيورٽي گارڊز پنهنجي حياتين کي قربان ڪري دهشتگردن کي روڪيو ۽ وقت سر ڪارروائي سان وڏي تباهي کي ناڪام بڻايو. هن چيو ته قانون لاڳو ڪندڙ ادارن طرفان ترت رد عمل به واکاڻ جوڳو آهي، رينجرز ۽ سنڌ پوليس وقت سر ڪارروائي ڪري مختصر وقت ۾ دهشتگردن جو خاتمو ڪيو. پاڪ فوج جي سربراهه جنرل قمر جاويد باجوا چيو ته هو بهادر قوم جي سهڪار سان دهشتگردن جي هر ڪوشش ناڪام بڻائي ڇڏيندا، ملڪ ۾ ڊگهي عرصي تائين امن شهيدن جي قربانين سبب ممڪن ٿيو آهي.
ڪراچي اسٽاڪ ايڪسچينج تي حملي جو مقصد مقصد سيڙپڪارن ۾ خوف پيدا ڪرڻ هو: ڊي جي رينجرز
ڪراچي اسٽاڪ ايڪسچينج تي حملي جو مقصد ملڪي معيشت کي نقصان پهچائڻ ۽ سيڙپڪارن ۾ خوف پيدا ڪرڻ هو، ڊي جي رينجرز سنڌ عمر بخاري چيو آهي ته دهشتگرد عمارت ۾ رتوڇاڻ ڪرڻ ۽ شهرين کي يرغمال بڻائڻ جي مقصد سان آيا هئا، دهشتگرد هڪ ڪار ۾ سوار ٿي آيا ۽ وٽن وڏي تعداد ۾ هٿيارن سوڌو کاڌي پيتي جو سامان به موجود هو، آءِ اي جي ڪراچي سان گڏ پريس ڪانفرنس دوران ڊي جي رينجرز چيو ته فورسز جي بهادري توڙي وقت سر ڪارروائي جي نتيجي ۾ دهشتگرد موقعي تي ئي مارجي ويا، ڪراچي اسٽاڪ ايڪسچينج تي حملي وقت عمارت ۾ عملي سوڌو هڪ هزار کان وڌيڪ ماڻهو موجود هئا، اسٽاڪ ايڪسچينج تي حملو ناڪام بڻائي ڇڏيو، دهشتگردن کي عمارت اندر داخل ٿيڻ نه ڏنو، پوليس ۽ رينجرز دهشتگردن کي گيٽ تائين محدود رکيو، 8 منٽن اندر دهشتگردن کي ماريو ويو، ڊي جي رينجرز جو چوڻ هو ته 25 منٽن ۾ عمارت کي ڪليئر ڪرايو ويو، دهشتگردن وٽ وڏا ڳرا هٿيار هئا.
پاڪستان اسٽاڪ ايڪسچينج حملو: سنڌ جي گورنر ۽ وڏي وزير طرفان مذمت، آءِ جي سنڌ کان رپورٽ طلب
وڏي وزير مراد علي شاهه پاران پاڪستان اسٽاڪ ايڪسچينج تي حملي جي مذمت ڪئي وئي آهي، سنڌ جي گورنر پاران به حملي جي مذمت ڪئي وئي آهي، آءِ جي سنڌ کان واقعي جي رپورٽ طلب ڪئي وئي آهي، ٻئي طرف ايس ايس پي سٽي جو چوڻ آهي ته اسٽاڪ ايڪسچينج ٻاهران حملي ۾ 5 اهلڪار ۽ 2 شهري شهيد ٿيا آهن، حملي ۾ زخمي ٿيل 7 ماڻهن کي سول اسپتال پهچايو ويو آهي، ڊي آءِ جي سائوٿ جو چوڻ آهي ته دهشتگردن جديد هٿيارن سان حملو ڪيو هو، جيڪو ناڪام بڻايو ويو.
